Siminariu Tiologiku di Igreja Evangelika di Guiné-Bissau - STIEGB
Disna di fundason di igreja ivangelika di Guine-Bissau, na kumsada di ano 1940, Leslie Brierley omi di purmeru misionariu na Guine-Bissau,Bessie Brierley, sempri i teneba vontadi di purpara futurus pastoris.
Ku tempu, un kasa kumpradu na Bissau nobu (Belen), asin ki kumsadu nobu tarbadju. Na mesmu anu, na 1950, purmeru skola bibliku iabridu ku seis alunus. Nin i ka tarda, ki kasa kema, pabia di falta di utru lugar, skola bibliku fica.
Sugundu skola bibliku bin iabridu na lenden, na norti di pais, na 1953 ku novi alunus, ku sedu esis: Pedro da Silva, Chucha, Augusto Fernandes, João Nascimento, Amaro Lopes, Barbosa Lamine, Ernesto Lima, João Lopes ku Fernando Cardoso. E ta nsinaduba Biblia, purtugis, saudi ku mesiñus. E ta teneba stagiu, tambi na kada fin di simana alunus ta sai pa ivangelisason na diferentis tabankas di pais.
Mas tardi, grupu ku ta tarbadjaba na ivangelisason ku plantason di igreja kirsi ciu, pa kila kursu ku ta dadu na skola bibliku pasa sedu di kurtu prasu. Es dura alguns anus antis di luta di libertason nasional. Na 1960, numeru di obrerus ku ta partisipa di kursu i des, sinku kasadus ku sinku solterus. tambi i iabridu spasu pa prisbiterus ku utrus membrus di igreja ku sedu novi djinti e pasa sedu 19 alunus. Tris anu pasa, Institutu Bibliku (IB) sufri ciu na kumsada di luta armada. Pa kila IB fica.
Son na 1997, utru bias, na Bissau, IB torna iabri si porta, nunde ki kunsa ku un grupu pikininu, menus di sinku jinti. Grasas a Deus, tarbadju kontinua na Bissau te 1993. Duranti e tempu i trenadu mais di 30 obrerus, ku dividi na 5 turma diferenti.
Pa roson garandi (sustentu ku lugar sertu), na 3 di otubru di 1993, IB i mudadu di Bissau pa setor di Bafatá, sekson di Ntchumbé. Na e lugar, governu di republika di Guiné-Bissau, pati un kau pa igreja ivangelika ku ta midi 94,44 hectar. Suma i sedu kau dingidu, kau garandi ku ta da pa labra, ki kau i sedu bom pa aulas. Na e kau, i kumpudu kau ku tene kasas pa pursoris ku alunus mora ku sala di aula. Disna di mudansa di Bissau pa Ntchumbé, IB forma ja mas di 100 lideris, nunde ke na sirbi na diferenti lugar na Afrika, Gambia, Senegal, Amerika, Brasil, Eropa, Portugal, Spanha.
Apesar di manga di purblema ku desafiu garandi, no fia na Deus ki pudi tudu kusas ki guianu pa ngañu. Na fe pa fe, no oca gloria di Siñor. Suma ku no lema fala:
MEDU KA TEN! SO DIANTI!
